42 டிகிரி வெப்பத்தில் இருந்து 36 டிகிரியாக குறைந்தது

சிவகாசியில் கடந்த 2 மாதங்களாக கடும் வெப்பம் நிலவி வந்த நிலையில், கடந்த சில நாட்களாக அவ்வப்போது மழை பெய்து வருகிறது.

சிவகாசியில் பொதுவாக ஜூலை, ஆகஸ்டு மாதங்களில் சுமார் 38 டிகிரி செல்சியஸ் வரை வெப்பநிலை காணப்படும். ஆனால், இந்த ஆண்டு கடந்த 2 மாதங்களாக வெப்பத்தின் தாக்கம் அதிகமாக இருந்தது. பகல் நேரங்களில் வெப்பநிலை சுமார் 42 டிகிரி செல்சியஸ் வரை உயர்ந்ததால் பொதுமக்கள் கடும் அவதியடைந்தனர்.

இந்த நிலையில், செப்டம்பர் 3-ந் தேதி லேசான தூறல் மழையும், 4-ந் தேதி மிதமான மழையும் பெய்தது. தொடர்ந்து, 5-ந் தேதி சனிக்கிழமை மாலை 5.30 மணி முதல் 7 மணி வரை சுமார் ஒரு மணி நேரம் மழை பெய்தது.

எனினும், 5-ந் தேதி பெய்த மழைக்குப் பின்னர் வெப்பத்தின் தாக்கம் அதிகரித்தது. இதனால் மழை பெய்தும் வெப்பம் தணியாத நிலை ஏற்பட்டது.

இதையடுத்து, 6-ந் தேதி மீண்டும் லேசான தூறல் மழை பெய்தது. அதன் காரணமாக நேற்று (7-ந் தேதி) சிவகாசியில் வெப்பநிலை சுமார் 36 டிகிரி செல்சியஸாக குறைந்தது. கடந்த 2 மாதங்களாக நிலவி வந்த கடும் வெப்பத்துடன் ஒப்பிடுகையில், வெப்பநிலை குறைந்திருப்பது பொதுமக்களுக்கு சற்று ஆறுதலை ஏற்படுத்தியுள்ளது.

மேலும், வருகிற 10-ந் தேதி முதல் சிவகாசி மற்றும் சுற்றுவட்டார பகுதிகளில் மழை பெய்ய வாய்ப்பு இருப்பதாக எதிர்பார்க்கப்படுகிறது. தொடர்ந்து மழை பெய்தால் வெப்பத்தின் தாக்கம் மேலும் குறையும் என பொதுமக்கள் எதிர்பார்க்கின்றனர்.